កម្មវិធីផ្សព្វផ្សាយបច្ចេកទេសកសិកម្មថ្មីដែលធន់នឹងការប្រែប្រួលអាកាសធាតុ(ASPIRE) គឺជាកម្មវិធីរបស់រាជរដ្ឋាភិបាលកម្ពុជាមានរយៈពេល៧ឆ្នាំ។ កម្មវិធីបានចាប់ផ្តើមអនុវត្តដោយមានការចុះហត្ថលេខាលើកិច្ចព្រមព្រៀងហិរញ្ញប្បទានរវាងរាជរដ្ឋាភិបាលកម្ពុជា និងមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) នៅថ្ងៃទី០៥ ខែមីនាឆ្នាំ២០១៥។ កម្មវិធីអនុវត្តនៅ ខែមិថុនាឆ្នាំ២០១៥ ហើយបានសម្ពោធជាផ្លូវការនៅថ្ងៃទី០៨-០៩ខែតុលា ឆ្នាំ២០១៥ នឹងបញ្ចប់នៅ ថ្ងៃទី៣១ ខែកុម្ភៈ ឆ្នាំ២០២២ និងបិទបញ្ចប់ហិរញ្ញប្បទាននៅថ្ងៃទី៣១ ខែកញ្ញា ឆ្នាំ២០២២។ ថវិកាសរុបមានចំនួន ៦៧,៧ លានដុល្លារអាមេរិក។
នៅឆ្នាំ២០១៥ កម្មវិធី ASPIRE បានចាប់ផ្តើមអនុវត្តនៅខេត្តគោលដៅចំនួន៥ មាន៖ ខេត្តកំពង់ឆ្នាំង ពោធិសាត់ បាត់ដំបង ព្រះវិហារ និងក្រចេះ។ នៅឆ្នាំ២០១៧ កម្មវិធីបានពង្រីកទៅខេត្តស្ទឹងត្រែង ហើយនៅឆ្នាំ២០១៨ កម្មវិធីបានពង្រីកទៅខេត្តចំនួន៥ទៀតមាន៖ ខេត្តកណ្តាល តាកែវ កំពត ព្រៃវែង និងស្វាយរៀង និងឆ្នាំ២០១៩ បានបន្តពង្រីកទៅខេត្តចំនួន៩ ទៀតមាន៖ ខេត្តកំពង់ស្ពឺ រតនគីរី មណ្ឌលគីរី សៀមរាប កំពង់ធំ ប៉ៃលិន កំពង់ចាម និងត្បូងឃ្មុំ ក្នុងឆ្នាំ២០២០ ក៏បានពង្រីកទៅខេត្តចំនួន៤ទៀត គឺខេត្តកោះកុង ព្រះសីហនុ កែប និងឧត្តរមានជ័យ ដែលសរុបមកដល់បច្ចុប្បន្ននេះគឺទាំង២៤ខេត្ត។
គោលដៅ៖ កាត់បន្ថយភាពក្រីក្រ និងបង្កើនភាពធន់របស់កសិករខ្នាតតូចក្រីក្រ និងងាយរងគ្រោះនៅក្នុងប្រទេសកម្ពុជា។
គោលបំណង៖ បង្កើតគំរូនៃការផ្តល់សេវាផ្សព្វផ្សាយកសិកម្មប្រកបដោយប្រសិទ្ធភាព
ជួយកសិករខ្នាតតូចចូលរួមចំណែកក្នុងការពង្រីកមូលដ្ឋានសម្រាប់ជំរុញកំណើនសេដ្ឋកិច្ចតាមរយៈការប្រកបរបរកសិកម្មដែលមានភាពធន់ និងទទួលបានប្រាក់ចំណេញ និងត្រូវប្រើប្រាស់ជាគោលនយោបាយនៅឆ្នាំ២០២១។
កម្មវិធីមានសមាសភាគចំនួន ៤ គឺ៖
១). ការអភិវឌ្ឍគោលនយោបាយផ្អែកលើភស្តុតាង
២). ការអភិវឌ្ឍសមត្ថភាពសម្រាប់សេវាផ្សព្វផ្សាយកសិកម្ម
៣). ការកែលម្អសេវាផ្សព្វផ្សាយកសិកម្ម និង
៤). ការគាំទ្រហេដ្ឋារចនាសម្ព័ន្ធរូបវ័ន្តកសិកម្មធន់ទៅនឹងការប្រែប្រួលអាកាសធាតុ។